Prjónabloggið

Ungbarnasett og tilnefning til íslensku vefverðlaunanna:)

2012-01-31T10:41:00.008Z

Ég var að ljúka við þetta litla sett. Húfa og vettlingar sem ég prjónaði úr baby garni sem ég keypti í Europris. Prjónarnir voru númer 2,5. Mér fannst þetta bara koma ágætlega út svona munstrað. Svo verð ég nú að segja að mér finnst dokkan duga ótrúlega vel, eftir að ég er búin að klára bæði húfuna og vettlingana, er alveg hálf dokka eftir :)

Uppskriftin kemur alveg úr kollinum á mér, ég semsagt skáldaði hana bara jafnóðum og ég prjónaði. Mér finnst það oft koma vel út, og þá verður stykkið líka yfirleitt alveg eins og maður vill sjálfur :)

En hér kemur svo mynd af settinu :)

Svo langar mér að segja ykkur frá því að bloggið mitt er tilnefnt til íslensku vefverðlaunanna 2011. Verðlaunaafhending fer svo fram föstudaginn 3.febrúar. Fyrir mér er þetta ótrúlega flott viðurkenning fyrir bloggið mitt og greinilegt að það sem ég er að gera hérna er að skila sér áfram :) Og hvernig sem fer, þá er ég ótrúlega ánægð með þann árangur að komast í úrslit. Það er stórt afrek út af fyrir sig :)

Takk kæru lesendur fyrir að lesa bloggið mitt. Ég held áfram með prjónana mína og bloggið með bros á vör, eins og vanalega :)

Hér er linkur á þær vefsíður sem eru tilnefndar í nokkrum flokkum.

Kveðja, Fríða

Puff Daddy púði/sessa :)

2012-01-26T15:27:00.004Z

Þessi finnst mér svooo flottur. Hann heitir Puff Daddy og uppskriftin er ókeypis og hana er að finna HÉR. Svo set ég uppskriftina líka hér til hægri eins og vanalega :)

Ég held að þessi sé frekar einfaldur og eflaust mjög skemmtilegt að prjóna hann :) Ég á eflaust eftir að prufa það þegar ég hef örlítið meiri tíma ;)

Þæft kórónu eyrnaband :)

2012-01-05T20:33:00.005Z

Ég prjónaði um daginn þetta sæta kórónueyrnaband. Það er prjónað úr létlopa og svo þæft, svo endaði ég á að sauma í það smá blómamunstur og skreytti að lokum með perlum.

Reyndar vildi litla skottan mín bara ALLS ekki leyfa mér að setja bandið á sig, þannig að ég hef því miður ekki mynd af henni með það á sér.

En hér koma nokkrar myndir :)

Mynd af bandinu fyrir þæfingu :)

Mynd af bandinu eftir þæfingu.

Og svo að lokum mynd af bandinu alveg tilbúnu.

Hello kitty.

2012-01-04T10:57:00.002Z

Ég var að vafra á netinu og fann þá ókeypis uppskrift af þessari sætu Hello Kitty peysu. Ég set uppskriftina hér til hliðar undir "prjónauppskriftir"

Ég vona að einhver geti nýtt sér þessa uppskrift :)

Jólagjafir 2011

2012-01-03T10:50:00.005Z

Jæja, það er langt síðan síðast, en ég er bara búin að vera á haus í jólaundirbúningu frá því í nóvember :) En nú eru jólin að verða búin og allt að komast í fasta rútínu aftur. Ég prjónaði nú ekki mikið fyrir jólin, en náði samt að gera tvær jólagjafir. Skelli inn myndum af þeim hérna.

Vettlingar sem ég prjónaði úr léttlopa.

Húfa með loppuförum fyrir frænku mína sem er mikil hundakona. Og vettlingar við. Prjónað úr léttlopa.

Svo fer ég að hafa meiri tíma til að prjóna á næstunni, þannig að vonandi á ég eftir að skella inn myndum hérna fljótlega aftur :)

Hermannabuxur.

2011-11-17T11:20:00.007Z

Ég veit, ég veit, þetta á að vera PRJÓNABLOGG hjá mér, en mig langaði samt svo að sýna ykkur buxurnar sem ég var að SAUMA á strákana mína :) Ég saumaði á þá hermannabuxur í gær, og þeir voru svona líka ótrúlega ánægðir með þær :) Skoppuðu glaðir í bragði inn á leikskólann sinn í morgunn í nýju hermannabuxunum sínum ;)

Hér koma svo myndir af þeim í buxunum.

Steinar Örn í sínum buxum :)

Bjarki Þór í sínum buxum :)

STÓRT knús :)

Heimalitað garn :)

2011-11-17T09:45:00.013Z

Í gær var ég að prufa nýja aðferð til að lita garn með Cool Aid. Ég tók myndir af ferlinu og hérna koma þær :)

Ég byrjaði á því að blanda 3 liti af kool aid.

Setti í klakabox og frysti. Garnið sem ég notaði var Merino Blend Chunky sem ég keypti í rúmfatalagernum.

Ég losaði dokkurnar og vatt þær svona upp. Ég vafði bara garninu utan um stólbak og batt það svo saman á tveim stöðum, svo að það færi ekki í flækju í ferlinu :)

Svo setti ég garnið í eldfast mót og raðaði klökunum ofan á það.

Setti álpappír yfir og inn í ofn. 150 c°hita og blástur.

Þegar ég kíkti 20 mínútum seinna, þá voru klakarnir bráðnaðir og vatnið algjörlega gufað upp og garnið varla búið að litast. Þannig að ég setti fleiri klaka á og hellti c.a. 3 glösum af vatni yfir garnið. Þannig að það var vel blautt í gegn.

Eftir c.a. 20-30 mínútur í viðbót var garnið orðið litað og vatnið orðið alveg glært. Þá tók ég eldfasta mótið og setti í sturtubotninn hjá mér og skolaði úr garninu fyrst með köldu vatni.

Og svo skolaði ég með heitu vatni.

Svo lét ég garnið þorna á ofninum.

Og endaði á að vefja garninu upp í hnykla.

Ég var bara sátt við útkomuna og ætla að prjóna vettlinga á strákana mína úr þessu. ( því að strákar eiga víst eldrei OF mörg pör af vettlingum). Ég er að hugsa um að nota líka endurskins band í vettlingana svo að þeir sjáist vel í myrkrinu í vetur :)

Endilega prufið að lita garn, það er MJÖG auðvelt og alveg ótrulega gaman. Og skemmtilegast er auðvitað að prjóna úr því og sjá hvernig liturinn og munstrið kemur út :)

Ég set svo inn mynd af vettlingunum þegar ég er búin með þá :)

Góða skemmtun :)

Sætur barnakjóll :)

2011-11-16T13:00:00.003Z

Ég var að finna uppskrift af þessum sæta kjól :) Kannski ég eigi eftir að prjóna hann einhverntíman á litlu skottuna mína :) Uppskriftin er hér. Og svo set ég hana líka hér til hliðar undir "prjónaupksriftir :)

Prinsessan komin með smekkinn sinn :)

2011-11-11T12:17:00.003Z

Ég var búin að segja aðég ætlaði að setja inn mynd af dótturinni með smekkinn sem ég heklaði á hana... Hér kemur myndin :) Smekkinn er mjög auðvelt að hekla og uppskriftin af honum er hér til hliðar undir "hekl uppskriftir"

Svo langar mér til að minna ykkur á facebook síðuna mína, en þar er ég að selja prjónamerki sem ég bý til, prjónauppskriftir eftir mig og tölur. (Fleiri tegundir af tölum eru reyndar á leiðinni) Svo er aldrei að vita nema að það bætist í vöruúrvalið einhverntíman....

http://www.facebook.com/perluprjon

Magic loop :)

2011-11-04T10:43:00.007Z

Ég er búin að ætla mér mjög lengi að læra að prjóna tvo hluti á einn hringprjón... Í gær lét ég loksins verða að því. Það vill oft vera þannig að maður miklar hlutina svoldið fyrir sér og ég hélt einmitt að þetta væri alveg hrikalega flókið. En svo þegar ég var byrjuð, þá var þetta bara ekkert mál !!! Ég notaði bara þetta myndband hér. Og í gærkvöldi kláraði ég að ganga frá vettlingunum sem ég prjónaði á eldri strákinn minn. Ég held að ég hafi aldrei verið jafn fljót að prjóna eitt vettlingapar. Þannig að þetta er bæði fljótlegra og skemmtilegra, svo ég tali nú ekki um að eiga ekki hinn vettlinginn eftir þegar þú ert búin með annan :)

Hér koma svo nokkrar myndir af ferlinu :)

Búin með tvær umferðir, með myndbandið til hliðsjónar :)

Komin að þumlum :)

Komið að úrtökunni.

Og vettlingarnir tilbúnir. Og frumburðurinn fór glaður í leikskólann með nýju vettlingana sína :)

Meira hekl :)

2011-10-28T10:43:00.003Z

Prinsessan á heimilinu á svo æðislega sætann fjólubláann kjól sem hún fékk í sængurgjöf og mér fannst verða að vera fjólublár slefsmekkur við kjólinn. Ég brá á það ráð að prufa að hekla handa henni smekk. Ég notaði uppskrift sem er hér til hliðar---- > á síðunni. Garnið keypti ég í söstrene grene og heklunálin var númer 3,5.

Hér er svo mynd af smekknum, en mynd af dömunni set ég seinna inn, en ég náði ekki að taka af henni mynd þegar hún var í kjólnum með nýja fína smekkinn sinn, en ég geri það næst þegar hún verður í honum :)

Prjónamerki

2011-10-24T16:08:00.008Z

Mig langar svo að sýna ykkur prjónamerki sem ég er að búa til og selja. Þau eru flest öll gerð úr postulíni og glerperlum en sum eru líka gerð úr plastperlum. Prjónamerkin er ég að selja á þessari síðu: www.facebook.com/perluprjon

Og hér er svo mynd af einni gerðinni.

Það er ekki svo langt síðan ég byrjaði að nota prjónamerki og núna þegar ég er komin upp á lagið, þá get ég ekki verið án þeirra ;) Og ég ELSKA að nota falleg prjónamerki :) Hvernig líst ykkur svo á merkin mín ?

Húfa úr yndislega angórugarninu :)

2011-10-05T10:05:00.007Z

Jæja, nú er ég búin að prjóna húfu úr yndislega mjúka angórugarninu sem ég keypti í Garnbúð Gauju. Þetta garn er algjört æði það er svo mjúkt og fallegt. En svo notaði ég líka rasmillas yndlingsgarn sem ég keypti líka hjá Gauju í Mjóddinni. En það er blanda af ull og bómull, ótrúlega mjúkt og drjúgt garn !!! Ég notaði bæði yndlingsgarnið og angóruna tvöfalt og prjóna númer 4 og það dugði ein dokka af angórugarninu, en af rasmillas garninu á ég eflaust nóg eftir til að prjóna 50 húfur til viðbótar ;) En fyrst ég er að tala um garnbúð Gauju, þá verð ég bara að segja hvað mér finnst alltaf gaman að koma þar inn !!! Konurnar þar eru alltaf jafn almennilegar og svo er líka svo gaman að spjalla við þær um prjónaskapinn :) Mæli með þeim ;)

Ég fékk uppskrift af húfunni þegar ég keypti garnið, en ég þurfti auðvitað að breyta uppskriftinni aðeins, en það virðist loða eitthvað við mig að breyta alltaf uppskriftunum sem ég fer eftir. Ég semsagt breytti úrtökunni aðeins og eyrunum líka. Svo setti ég reyndar líka garðaprjónskant neðst á húfuna, sem var ekki í uppskriftinni....

En hér kemur svo útkoman :)

Og svo að lokum litla snúllan með nýju, mjúku húfuna sína :)

Frikki froskur :)

2011-09-13T20:23:00.003Z

Ég fór í smá garnleiðangur í gær og rakst þá á riiisastóra dokku af grænu ACRÝL garni, og ég sem aldrei prjóna úr acrýl. Mér fannst liturinn svo flottur og svo þegar ég fór að skoða dokkuna, þá sá ég að innan í miðanum sem var utanum garnið var uppskrift af þessum sæta froski. Ég semsagt keypti dokkuna og gat auðvitað ekki beðið eftir að prófa að hekla hann og hér er útkoman. Ég hef aldrei heklað eftir uppskrift og hvað þá á ensku. En svo var þetta bara ekkert mál.
Froskurinn fer á góðann stað, en það er búið að panta hann hjá mér. ( Hjördísi systir fannst hann svo flottur, og hana langaði í hann) Svo að þessi fer til hennar. Svo er búið að panta tvo aðra hjá mér, því að synirnir sáu hann á stofuborðinu mínu þegar þeir komu heim af leikskólanum í dag og voru fljótir að leggja inn pöntun.

En hér kemur svo Frikki froskur :)

Lambhúshettur á leikskólann :)

2011-08-24T10:04:00.007Z

Jæja, strákana vantaði lambhúshettur fyrir leikskólann í vetur. Ég fann þessa æðislegu uppskrift í bókinni fleiri prjónaperlur og ákvað að prufa að prjóna svoleiðis. Reyndar var uppskriftin bara gefin upp fyrir eina stærð og úr kambgarni, þannig að ég notaði annað garn, smart úr rúmfó, prjóna númer 4 og notaði sama lykkjufjölda, en svo gerði ég þær bara lengri en sagt er í uppskriftinni. Það kom bara þokkalega vel út og hetturnar passa svona líka ferlega vel á strákana :)

Sniðið finnst mér svo gott, vegna þess að húfurnar liggja svo vel að andlitinu og eru ekki að fara ofan í augu og af eyrunum.

En allavega, hér koma svo myndir af lambhúshettunum.

Steinar Örn ( 3 ára ) með sína lambhúshettu :)

Bjarki Þór ( 5 ára ) með sína lambhúshettu :)

Og svo kemur ein mynd af lambhúshettunum.

Strákarnir komnir í hvala-peysurnar sínar :)

2011-08-18T09:44:00.006Z

Jæja, strákarnir fóru í nýju peysunum sínum í leikskólann í morgunn. Þeir voru svo ánægðir með þær, eins og reyndar með allt sem ég prjóna á þá. Þeir eru alltaf jafn spenntir þegar ég er að prjóna eitthvað á þá og fylgjast vel með og spurja reglulega hvort ég sé búin eða hvort ég sé núna að prjóna seinni ermina og svo framveigis :)

En þeir voru allavega MJÖG ánægðir með nýju peysurnar sínar í morgunn.

Og hér koma svo myndir af þeim í þeim.

Algjörir töffarar :)

Meira en lítið ánægðir með peysurnar sínar :)

Það er nú ekki hægt að vera OF lengi í myndatöku án þess að leika sér aðeins ;)

Hvalapeysur

2011-08-17T17:08:00.004Z

Ég prjónaði þessar tvær peysur á strákana mína sem eru 3 og 5 ára. Sá eldri var að skoða prjónabækurnar mínar þegar hann sá þessa peysu og bað mig um að prjóna hana :) Sá yngri vill alltaf vera eins og stóri bróðir, þannig að auðvitað gerði ég á þá báða. Þær verða fínar í leikskólann í vetur :)

Hér er svo ein mynd af munstrinu :)

Ég notaði léttlopa og prjóna Nr. 4 og uppskriftin er úr bókinni "Fleiri prjónaperlur".

Ég set svo kannski seinna inn mynd af strákunum í nýju peysunum sínum :)

Litla snúllan mín komin í little sisters kjólinn :)

2011-06-14T12:51:00.002Z

Jæja, nú er prinsessan á heimilinu farin að passa í kjólinn sem ég prjónaði á hana um daginn :) Ég ákvað því að skella inn einni mynd af henni í kjólnum sínum.
Fyrir ykkur sem langar að prjóna svona kjól þá set ég inn link af uppskriftinni hér til hægri undir "prjónauppskriftir".

Teppið sem litla prinsessan mín liggur á saumaði ég fyrir 19 árum, en þá var ég 14 ára ( Vá hvað mér finnst ég vera gömul þegar ég skrifa "fyrir 19 árum" !!! Mér finnst ég nefnilega ekki vera deginum eldri en 20 ;)

En allavega... hér kemur myndin :)

Silkihúfan :)

2011-05-26T09:22:00.009Z

Jæja, þá er ég búin að prjóna silkihúfuna og var bara nokkuð ánægð með árangurinn :) Ég er reyndar búin að prjóna tvær húfur og ég get örugglega prjónað eina eða tvær í viðbót úr sama hnyklinum. Þannig að það er ekki hægt að segja annað en að einn svona hnykill sé mjööög drjúgur :)

En hér kemur svo mynd af einni húfunni.

Og svo ein mynd af dótturinni með nýju mjúku fínu húfuna sína :)

Ég notaði semsagt Maharaja silki sem ég keypti í garnbúð Gauju í Mjóddinni og prjóna númer 2,5.

En svo þar sem að gestagangur um síðuna mína er frekar mikill, eða um 10.000 gestir á mánuði eða fleiri, sem er auðvitað bara ÆÐISLEGT, þá langar mig svolítið til að biðja ykkur um að láta mig vita að þið hafið kíkt hingað inn ;) Það er svo gaman að sjá hverjir kíkja og hvað ykkur finnst um bæði síðuna mína og það sem ég er að setja hérna inn, bæði það sem ykkur finnst gott og líka það sem ykkur finnst miður :)

Endilega kvittið fyrir komuna, það er svo gaman að fá skilaboð frá ykkur.

En það er mjög auðvelt að setja inn komment. Þið bara ýtið á "post a comment" hér fyrir neðan og veljið Name/URL og skrifið nafnið ykkar (eða gælunafn) og smá skilaboð og ýtið á publish your comment :)

Bestu prjónakveðjur, Fríða :)

LOKSINS.....

2011-05-12T13:08:00.000Z

....lét ég verða af því að kaupa mér silki :)
Ég er búin að ætla mjög lengi að prufa að prjóna úr silki og fór núna í morgun í Garnbúð Gauju og keypti mér ofsalega fallegt bleikt silkigarn, Og er byrjuðað prjóna húfu á litlu prinsessuna mína :) Svo stóðst ég ekki mátið og keypti ótrúlega fallegt og sjúklega mjúkt angoru garn. Ég féll algjörlega fyrir því :) Ég var að hugsa um að kaupa mér Rasmilla's yndlingsgarn sem er æðislegt ullar/bómullar garn eða Rasmilla's luksusgarn sem er blanda af ull og silki og prjóna húfu og nota angoru garnið með því.
Svo verð ég nú eiginlega að láta það fylgja með hvað ég fékk æðislega góða og persónulega þjónustu hjá henni. Mér finnst alltaf jafn gaman að fara í þessa búð. Og alltaf jafn vel tekið á móti mér :)

En hér er svo mynd af nýja, fallega og mjúka garninu mínu :)

Og hér kemur svo mynd af nýjasta prjónaverkefninu.... Silkihúfan á litlu snúlluna :) Ég hlakka til að klára hana og vona að hún passi á dömuna í sumar :)

Little sisters dress

2011-05-06T22:59:00.004Z

Ég var eð klára þennan sæta kjól í dag. Mér hefur lengi langað til að prjóna hann og ákvað að láta verða af því núna að prjóna hann á littlu prinsessuna mína sem er rúmlega 2 mánaða. Ég hugsa að kjóllinn fari svo að passa á hana mjög fljótlega :)

Garnið er superwash ullargarn úr rúmfatalagernum. Og prjónar númer 3,5.

Ég heklaði svo þessi blóm og saumaði á kjólinn. En það eru kennsluvideo hér til hliðar sem sýna hvernig á að hekla svona blóm.

Og svo setti ég þessar sætu hjarta tölur sem ég átti til.

Svo bíð ég bara spennt eftir að máta hann á litlu dömuna :) Ég set svo kannski inn mynd af henni þegar hún er komin í kjólinn :)

Vettlingar

2011-04-19T13:29:00.004Z

Yngri strákinn minn vantaði vettlinga svo að ég skellti í par fyrir hann. En það er nú samt bara þannig að þegar ég prjóna á annan strákinn, þá verð ég líka að prjóna á hinn ;) Þannig að ég gerði tvenn pör af vettlingum í sama lit, en ekki alveg eins samt.

Ég notaði merino blend superwash ullargarn og einband saman og prjóna númer 3,5. Og eins og alltaf þegar ég prjóna vettlinga, þá notaði ég enga uppskrift.

Ef ykkur vantar uppskrift af vettlingum, þá er ein uppskrift hér neðar á síðunni. Svo er bara hægt að fjölga lykkjum og hafa þá lengri ef ykkur vantar stærri vettlinga :)

Jarðaberja sett

2011-04-12T19:43:00.007Z

Litlu dóttir minni vantaði vettlinga, svo að ég ákvað að skella í eina vettlinga fyrir hana. Ég notaði afgang af superwash ullargarni sem ég átti í garn-kassanum mínum. Ég notaði prjóna Nr, 2,5 og uppskriftin er bara í höfðinu á mér. Og útkoman var þessi ;)

Svo fannst mér vettlingarnir svo krúttlegir að mér fannst eiginlega verða að vera húfa við þá líka, þannig að ég skellti mér í að prjóna eitt stykki jarðaberja húfu :) Ég notaði sama garn og sömu prjónastærð og uppskriftin af húfunni er líka alfarið í kollinum á mér :)

Svo er hér mynd af settinu saman :)

Og svo að lokum litla bjútíbollan í vettlingunum og með húfuna :)

Ég var ekki lengi með þetta sett, ætli ég hafi ekki verið c.a. 3 kvöld að prjóna það :)

Hjálmhúfa

2011-04-11T20:13:00.004Z

Ég prjónaði þessa húfu um daginn á dótturina :) Húfan er prjónuð úr æðislega mjúku ullargarni sem var keypt í Hagkaup. Þetta er mjög einföld uppskrift, en húfan er prjónuð í hring og þar af leiðandi þarf ekkert að sauma saman :) Ég var einn dag að prjóna hana :)

Uppskriftina fékk ég í bókinni Garn og Gaman.

Mér fannst litirnir svo mjúkir og æðislegir :)

Lítil sængurgjöf

2011-03-30T15:28:00.003Z

Ég prjónaði þessar hosur um daginn úr léttlopa og þæfði þær. Svo gaf ég litlum snáða þær ásamt öðru í sængurgjöf.

Svo er ég að prjóna svona núna handa dóttur minni sem er nýorðin mánaðargömul.

Uppskriftin er úr bókinni garn og gaman.

1 árs afmæli !!!

2011-03-12T20:49:00.002Z

Í dag 12. mars er eitt ár liðið frá því að ég byrjaði að blogga hérna :) Á þessu eina ári hafa hvorki meira né minna en 50.000 gestir skoðað síðuna mína !!! Ég vona að þið sem lesið þetta hjá mér hafið bæði gagn og gaman af :)

Ég byrjaði að prjóna aftur rétt eftir áramótin 2010 en þá hafði ég ekki snert prjóna síðan ég var í grunnskóla !!! Ég komst að því að það er hægt að finna ALLT sem maður þarf að finna sem tengist prjónaskap á netinu og ég nýtti mér það mjög mikið. Skoðaði t.d. allskonar kennslu video ef það var eitthvað sem ég kunni ekki eða var ekki viss um að ég væri að gera rétt. Eins var ég (og er) mjög dugleg að leita uppi allskonar fríar prjónauppskriftir á netinu.

Þegar ég byrjaði að blogga hérna, þá hafði ég hugsað með mér að það væri fínt að geta sett allt sem ég finn um prjónaskap á netinu hérna inn, kennslu video, uppskriftir og fleira svo að það væri aðgengilegra fyrir mig að finna það aftur. Svo vatt þetta upp á sig og nú er ég líka farin að setja myndir af öllu sem ég prjóna sjálf hérna inn líka :)

Ég veit að það eru margir sem skoða bloggið mitt reglulega og ég er mjög ánægð með að aðrir en ég sjálf hafa gagn af síðunni minni :)

Ef þið finni eitthvað sniðugt sem ykkur finnst að eigi heima á þessari síðu, þá megið þið alveg endilega láta mig vita svo að ég geti sett það hér inn :) Þið getið þá annaðhvort sett það inn sem komment eða sent mér e-mail á bjorkdesign(hjá)hotmail.com

Takk fyrir að lesa bloggið mitt kæru bloggvinir :)

Góða skemmtun og gleðilegt prjón :)

Heimalitað garn með Kool - Aid

2011-02-25T21:19:00.012Z

Ég ákvað í morgun að prufa að lita garn með kool aid. Mig hefur lengi langað til að prufa það og hérna kemur svo bæði aðferðin og útkoman :)

Ég byrjaði á að vefja garninu utan um stólbak, en ég notaði hvítt superwash ullargarn.

Þetta eru litirnir sem ég notaði, en ég hélt að þetta í bláa bréfinu væri blátt eða fjólublátt....

En liturinn í bláa bréfinu var svo bara eiginlega rauður eða dökk bleikur. Ég setti vatn í pott og duftið úr pakkanum. Setti svo garnið út í.

Svo lét ég suðuna koma upp og leyfði því að malla í c.a. 1 - 2 mínútur.

Setti svo garnið í vaskinn og skolaði það með köldu vatni, þar til það kom enginn litur úr því, en ég þurfti ekki að skola garnið lengi, því að liturinn var bara alveg fastur í garninu og vatnið var aftur orðið glært !!!

Svo setti ég hinn litinn út í vatn og setti hinn helminginn af garninu útí.

Lét suðuna koma upp og leyfi því að sjóaða í c.a. 1 - 2 mínútur.

Svo skolaði ég aftur úr garninu með köldu vatni.

Svo vatt ég garnið og setti það á ofninn og leyfði því að þorna alveg.

Endaði svo á að vefja því upp í hnykla, og svona er útkoman :)
Ég var bara nokkuð ánægð með litinn, þó að ég sé nú ekki viss um hvað ég eigi að prjóna úr því þar sem garnið er frekar stelpulegt... En ég hafði hugsað mér að nota það í vettlinga á strákana, þar sem ég hélt að duftið í bláa bréfinu væri blátt :)

Ég hef áður prufað að lita garn heima, en þá notaði ég wilton matarliti og edik, en útskýringar á því eru neðar á blogginu. Það er mun einfaldara að lita garnið með kool aid, því að það þarf ekkert edik til að festa litinn !!!

Endilega prufið að lita garnið ykkar, það er bæði mjög gaman að lita það og svo er sko alls ekki síðra að prjóna úr garni sem maður hefur litað sjálfur :)

Góða skemmtun !!!

Ullarsokkar og prjónaverðlaun :)

2011-02-24T20:30:00.007Z

Það er skemmtilegt frá því að segja að ég tók þátt í leik á facebook síðuunni Handverkskonur, sem er síða með hinu og þessu tengdu prjónaskap og fleira handverki. Ég sendi semsagt inn mynd af hendverki sem ég hef prjónað og sendi mynd af ungbarnasettinu sem ég kláraði um daginn. (Myndir af því hér neðar á síðunni). Ég endaði í öðru sæti og fékk þetta æðislega flotta silki-prjónaveski í verðlaun og með því fylgdu sætir pokar sem ég get notað utan um allskonar smádót tengt prjónaskap. Ég var mjög ánægð, en þetta kom í póstkassann hjá mér í dag :)

Hér er prjónaveskið lokað :)

Og hér er mynd af því opnu :)

En þegar ég prjónaði þetta ungbarnasett, þá lærði ég að prjóna svo ferlega sniðugann hæl, sem mér finnst mjög auðveldur. Ég hef aldrei prjónað ullarsokka vegna þess að ég hef ekki lagt í að gera hælinn. Ég ákvað að prufa að prjóna ullarsokka og eins hæl og er á hosunum. En þar sem ég var ekki með uppskrift af svoleiðis sokkum, þá skellti ég mér bara í að búa hana til :) Ég prjónaði regnbogavettlinga á yngri soninn í sumar og setti mynd af þeim og uppskrift hér neðar á bloggið. Þannig að ég ákvað að hafa sokkana í stíl við þá. Þegar ég var að prjóna sokkana á guttann, þá kom sá eldri til mín og spurði hvort ég ætlaði svo líka að prjóna svona sokka handa honum.... Og að sjálfsögðu gerði ég það líka :)

Ég notaði superwash ullargarn sem ég keypti í Europris og prjóna númer 3,5.

Og hér er svo útkoman.

Og hér er svo eldri strákurinn kominn í sína sokka :)

Hvala húfur :)

2011-02-02T21:52:00.008Z

Jæja, strákana vantaði húfur , þannig að ég ákvað að skella í húfur handa þeim :) Ég fékk uppskriftina af þessum sætu stroffhúfum í bókinni garn og gaman sem ég fékk í afmælisgjöf um daginn frá mömmu og pabba :) En munstrið af hvalamyndinni var í bókinni fleiri prjónaperlur sem ég fékk í afmælisgjöf frá manninum mínum og strákunum :) Strákarnir voru hæst ánægðir með hvalahúfurnar sínar, en sá eldri er einmitt í hvala hóp í leikskólanum og sá yngri segir að þetta sé hákarlahúfa ;)

Ég var ekki lengi að prjóna þær, en ég byrjaði á þeim á laugardaginn og kláraði þær á mánudagskvöld. Ég notaði superwash ullargarn sem ég keypti í rúmfatalagernum og prjóna númer 3,5. Svo saumaði ég myndina í með lykkjuspori.

Hérna eru svo húfurnar :)

Eldri strákurinn á leið í leikskólann með hvala húfuna sína:)

Yngri strákurinn á leið í leikskólann með "hákarla-húfuna" sína:)

Strákarnir voru svo ánægðir með nýju húfurnar að þeir settu þær á sig áður en þeir klæddu sig :) Ótrúlega sáttir í náttfötunum með fínu húfurnar sínar :)

Ungbarnasett

2011-01-24T20:42:00.007Z

Jæja, nú er ég loksins búin að klára heimferðarsettið fyrir litla krílið mitt sem er væntanlegt í heiminn í lok febrúar :) Ég byrjaði á þessu 1. nóvember og hélt að ég myndi ALDREI klára það ;) En það tókst, og ég náði að klára það í tíma. Og meira að segja prjónaði ég á sama tíma 2 jólasveinahúfur á strákana mína, 2 fyrirburahúfur fyrir vökudeildina og 5 jólagjafir !!! Ég hef aldrei prjónað peysu áður, þannig að ég er bara nokkuð ánægð með mig. Uppskriftina af peysunni fékk ég í blaði númer 218 frá Dale baby. Húfan er svona nokkurnvegin prjónuð eftir mínu höfði, en ég studdist samt við húfu-uppskrift úr sama blaði. (T.d. til að fá réttan lykkjufjölda). Hosurnar eru úr öðru blaði frá Dale baby. En vettlingana skáldaði ég alveg. (reyndar mjög einfaldir) Kannski ég skelli inn uppskriftinni af þeim við tækifæri ;)

Þetta er allt prjónað úr Dale baby ull og á prjóna nr 2 og nr 2 og 1/2.

Ég skelli inn myndum af settinu, en þið sjáið betur munstrið með því að smella á myndirnar.

Hér fyrir ofan er settið með bláum tölum og bláum böndum í hosum og vettlingum...

Og hér er svo settið með öllu bleiku ;)

Þar sem ég veit ekki kynið, þá þarf ég bara að sauma tölurnar í á fæðingardeildinni og setja rétt bönd hosurnar og vettlingana :) (Nema að maður plati kannski mömmu til að gera það)

Möbíus

2011-01-13T13:52:00.003Z

Sumir prjóna möbíus með því að prjóna stykki fram og til baka, setja svo snúning á og sauma hann svo saman. Aðrir prjóna hann þannig að þegar búið er að fitja upp, þá setja þeir snúning á lykkjurnar áður en tengt er saman í hring. En svo er til sérstök aðferð til að fitja upp furir möbíus. Það er mjög einfalt að prjóna hann svoleiðis ef maður fitjar rétt upp.
Ég er búin að setja inn hér til hliðar hvernig á að fitja upp fyrir möbius þannig að hann kemur út með snúningi. En ákvað að setja videoið líka hérna :)

http://www.youtube.com/watch?v=LVnTda7F2V4

Góða skemmtun og gangi ykkur vel :)

Möbíus

2011-01-04T20:56:00.002Z

Loksins prjónaði ég eitthvað á sjálfa mig :) En ég var að klára þennan möbíus. Fyrsta prjónaverkefnið mitt á árinu, en ég byrjaði á honum 29.12.10 og kláraði hann 01.01.11.

Uppskriftin er svosem engin, ég fitjaði bara upp 110 lykkjur með sérstakri aðferð (ætla að skella inn myndbandinu hérna til hliðar undir "kennsluvideo") og prjónaði svo bara slétta og brugðna umferð til skiptis, og bætti inn gataumferðum svona af og til :)

Síðasta jólagjöfin :)

2010-12-28T20:21:00.006Z

Jæja, nú kemur mynd af síðustu jólagjöfinni sem ég prjónaði. Ég tók þátt í svokölluðu leyniprjóni á barnalandi fyrr á þessu ári, en það gekk út á það að það var ein þar sem setti inn einn hluta úr uppskrift á dag. Svo prjónaði ég án þess að vita hvað ég væri að búa til. Fyrir rest var ég með þessa sætu tehettu í höndunum. Ég ég ákvað strax að gefa Fjólu mágkonu hana í jólagjöf, þannig að ég keypti teketil, 4 bolla og skál undir tepokann.

Tehettan er prjónuð úr superwash ullargarni, þannig að hún heldur te-inu vel heitu.

Undir tehettunni er svo lítill vasi þar sem hægt er að geyma einn tepoka :)

Uppskriftina af tehettunni er reyndar að finna hérna á síðunni minni undir "prjónauppskriftir"

Önnur jólagjöf

2010-12-27T20:50:00.007Z

Ég gerði líka þrjú svona eyrnabönd í jólagjafir í sitthvorum litnum. Blómin eru fest með tölu svo að þeim er hægt að breyta á nokkra vegu. Svo prjónaði ég líka lítið band með tveimur hnappagötum sem hægt er að setja utanum eyrnabandið til að láta það rykkjast. Ég veit ekki hvort það sjáist nógu vel þegar myndin er svona lítil, en hægt er að ýta á myndina og gera hana stærri, þá sést það betur.

Þessi mynd er semsagt sett saman með öllum útgáfum af einu og sama bandinu.

Ég gerði þrjá liti af bandinu. Svart og grátt.

Brúnt og mosagrænt

Grátt og bleikt.

Uppskriftin er bara í hausnum á mér, og garnið sem ég notaði var superwash ullargarn.

Jólagjöf

2010-12-27T16:18:00.002Z

Ég prjónaði nokkrar jólagjafir fyrir þessi jól og ætla að skella inn myndum af þeim á næstu dögum.

Fyrst koma vettlingar sem ég prjónaði handa kærasta systur minnar. En mig langaði að gera eitthvað aðeins öðruvísi og ákvað því að hafa þá ósamstæða.

Ég notaði ekki neina uppskrift og hreinlega man ekki hvað ég fitjaði upp margar lykkjur. En ég notaði léttlopa í þá, og munstrið gerði ég líka bara jafnóðum og ég prjónaði :)

Ég skelli svo inn fleiri myndum af jólagjöfum á næstu dögum.

Prjónað fyrir vökudeild.

2010-12-19T00:17:00.007Z

Ég var að klára að prjóna tvær húfur fyrir þetta frábæra framtak hjá Hafdísi Pricillu Magnúsdóttur, en hún era ð safna prjónuðum fyrirburahúfum fyrir vökudeild barnaspítala hringsins. Hún eignaðist sjálf fyrirbura á síðasta ári, held ég, og hana langar að gera góðverk fyrir vökudeildina. Þegar þetta er skrifað er hún búin að safna yfir 400 húfum sem hún ætlar að afhenda á aðfangadag.

Mér finnst þetta svo æðislegt framtak og ég vildi endilega vera með. En þar sem ég hef nú ekki mikinn lausann tíma, þá náði ég bara að prjóna þessar tvær húfur. En þær eiga vonandi eftir að koma að einhverju gagni.

Stærri húfan.

Minni húfan.

Báðar húfurnar.

Uppskriftin sem ég notaði er hér til hliðar undir "prjónauppskriftir". Þar eru tvær uppskriftir, en ég studdist við uppskrift sem heitir fyryrbura húfa stærð 32-36 vikur. Ég hafði reyndar stroff neðst á þeim í staðin fyrir nokkrar umferðir af garðaprjón. Í stærri húfuna notaði ég prjóna númer 3 og í þá minni notaði ég prjóna númer 2. Svo notaði ég bómullar garn sem ég átti hérna heima :)

Skín í rauðar skotthúfur ;)

2010-11-21T20:26:00.000Z

Strákunum mínum finnst alltaf æðislegt sport að fá að vera með jólasveina húfur í desember. Í fyrra fengu þeir að vera með einhverjar jólasveinahúfur sem ég keypti einhversstaðar hand aþeim. En gallinn var sá að þær voru bara úr einhverju gerfiefni sem er bara alls ekki nógu hlýtt fyrir þá.
Þannig að ég brá á það ráð að prjóna handa þeim jólaseveina húfur !!

Ég vildi nota eitthvað hlýtt og gott garn, en það mátti heldur ekki stinga. Þannig að ég notaði smart garn í þær, sem er superwash ullargarn og stingur ekki.

Hérna er svo útkoman :)

Uppskriftina fékk ég í bókinni prjónaperlur sem kom út í fyrra. En þar er húfan reyndar röndótt og ekki svona jólaleg ;)

Þeir voru heldur betur ánægðir með húfurnar sínar bræðurnir :)

Ungbarnateppi

2010-10-30T21:03:00.000Z

Jæja, nú er ég loksins búin að klára Bring it on baby blanket ungbarnateppið.

Ég þurfti að hafa það í hlutlausum lit en vildi samt hafa það svoldið öðruvísi og endaði með þessa þrjá liti. Ég var bara nokkuð sátt :)

En ég veit að það er ekki öllum sem finnst þessir litir "passa" fyrir ungbarn ;) Hvað finnst ykkur ???

Hér er svo nærmynd af munstrinu.

Uppskriftin er hér til hliðar á ensku, en svo var ég líka búin að setja inn á bloggið íslenska þýðingu á uppskriftinni. En það var ein almennileg á handavinnuspjallinu á barnalandi sem þýddi hana fyrir mig :)

Íslensku uppskriftina má finna hérna neðar á blogginu.

Skrímslabuxurnar í Norge :)

2010-10-28T18:20:00.000Z

Jæja, nú er litli frændi í noregi búinn að fá skrímlsabuxurnar sem ég prjónaði á hann :) Ég vona bara að hann geti notað þær í vetur í kuldanum :)

Ég ákvað að skella inn mynd af honum í buxunum :)

Eins og ég hef sagt svo oft áður, þá er uppskriftin hérna til hægri undir "prjónauppskriftir" og neðar á síðunni var ég búin að skrifa hvernig ég breytti þeim :)

Lambhúshetta og skrímslarass :)

2010-10-16T21:20:00.000Z

Jæja, nú er ég loksins búin að klára lambhúshettuna á yngri soninn líka :) Hann var búinn að bíða eftir að fá sína lambhúshettu og var sko heldur betur glaður að fá eins húfu og stóri bróðir :)

Ég set inn eina mynd af honum með nýju lambhúshettuna sína :)

Og hér kemur svo mynd af þeim báðum með lambhúshetturnar :)

Svo er ég búin að klára þriðju skrímslabuxurnar. En það var lítill frændi í noregi sem fékk þær sendar í síðbúna afmælisgjöf :)

Hérna er mynd af þeim að aftan.....

Og hér er svo mynd af þeim að framan :)

Uppskriftin af lambhúshettunni er hér til hliðar undir "prjónauppskriftir" Og uppskriftin af skrímslabuxunum er þar líka, ég reyndar breytti aðeins uppskriftinni af buxunum, en það er færsla hér neðar í blogginu þar sem ég útskýri hvernig ég breytti þeim :)

Vettlingar

2010-09-29T11:02:00.000Z

Ég var að klára þessa litskrúðugu vetlinga á yngri soninn :) Þeir eru prjonaðir úr garni sem heitir Labbetuss raggegarn sem ég fékk í Euoropris. Það er blanda af ull, nylon og acryl. (60%ull)
Ég fór ekki eftir neinni uppskrift, en notaði prjóna númer 3,5.

Svona prjónaði ég þá :

Fitjið upp 40 lykkjur og skiptið þeim á 4 prjóna (10 lykkjur á hvern) prjónið stroff (slétt og brugðið) í 22 umferðir. Svo slétt í 8 umferðir. Á hægri vettling prjónarðu svo 2 lykjur af fyrsta prjóni og prjónið svo 4 lykkjur í öðrum lit. Setjið þær svo strax aftur á vinstri prjóninn og prjónið þær aftur með sama garni og vettlingarnir eru prjónaðir úr. Prjónið svo venjulega út umferðina.
Á vinstri vettling prjónarðu þar til 6 lykkjur eru eftir á fjórða prjóni. Prjónar þá 4 lykkjur í öðrum lit. Setjið þær svo strax aftur á vinstri prjóninn og prjónið þær aftur með sama garni og vettlingarnir eru prjónaðir úr.

Svo prjónið þið 12 umferðir slétt og takið svo úr þanig:

Prjónn 1. takið eina óprjónaða lykkju yfir á hægri prjón, prjónið eina lykkju og steypið svo óprjónuðu lykkjunni yfir þá prjónuðu. prjónið út prjóninn.
Prjónn 2. prjónið þar til tvær lykkjur eru eftir á prjóninum og prjónið þær saman.
Prjónn 3. takið eina óprjónaða lykkju yfir á hægri prjón, prjónið eina lykkju og steypið svo óprjónuðu lykkjunni yfir þá prjónuðu. prjónið út prjóninn.
Prjónn 4. prjónið þar til tvær lykkjur eru eftir á prjóninum og prjónið þær saman.

Svo prjóna ég tvær sléttar umferðir og tek úr aftur alveg eins og ég gerði áður.

Svo prjóna ég eina umferð og tek svo úr í hverri umferð. En áður en ég fer að taka úr í hverri umferð þá skipti ég yfir í bláann lit. Þegar það eru svo 8 lykkjur eftir slikki ég garnið dreg spottann í gegnum lykkjurnar sem eftir eru á prjónunum.

Þegar þumallinn er gerður (með bláum lit) þá er aukabandið tekið úr lykkjunum og þær settar á tvo prjóna. (4 lykkjur á hvorn prjón) svo takið þið líka upp tvær lykkjur við sinnhvorn endann svo að ekki myndist gat við þumalinn. Samtals ertu þá með 6 lykkjur á hvorum prjóni eða 12 lykkjur allt í allt. Prjónið svo 10 umferðir slétt. Svo prjónið þið tvær lykkjur saman í byrjun og enda hvors prjóns í næstu umferð og svo tvær og tvær saman í síðustu umferðinni. Klippið svo garnið frá dragið garnið svo í gegnum lykkjurnar sem eftir eru á prjónunum.

Gangið vel frá ölum endum.

Góða skemmtun :)

Lambhúshetta

2010-09-29T09:33:00.000Z

Ég var að enda viðað prjóna þessa lambhúshettu fyrir eldri son minn. Svo á ég eftir að prjóna svona á þann yngri líka ;) Uppskriftin er hér til hliðar undir "fríar uppskriftir" og heitir Lambhúshetta frá Tinu. Hún er þykk og góð, prjónuð með klukkuprjón.

Ég notaði smart garn og prjóna númer 2 og 3,5.

Það er líka mjög flott að hafa hana í fleiri litum :)

Hérna kemur svo mynd að syninum með lambhúshettuna.

17 kílómetra langur trefill !!!!

2010-07-26T14:17:00.001Z

Ég rakst á frétt á www.dv.is um þessa konu sem er að prjóna trefil sem á að verða 17 kílómetra langur !!!! Mér finnst þetta ótrúlega sniðugt og gaman að fylgjast með henni í gegnum heimasíðuna hennar sem er www.frida.is. Hún heitir Fríða Björk, en ég vil samt bara að það sé á hreinu að það er EKKI ég sem er að prjóna þennan flotta trefil. Ég held að ég mundi ekki hafa þolinmæði í slíkt ;) En ef þið viljið, þá er öllum velkomið að taka þátt í þessu með henni og prjóna trefil sem hún bætir svo við sinn.... Kannski ég geri það einhverntíman.....

Hér er svo mynd af henni með trefilinn flotta. En myndina fékk ég lánaða á síðunni hennar.

Endilega kíkið á www.frida.is og fylgist með þessu flotta verkefni hjá henni :)

Spiderman vettlingar

2010-06-28T11:58:00.000Z

Síðasta uppskriftin í dag :) Ég fann þessa uppskrift af Spiderman vettlingum. Best að ég skelli henni inn líka :)

Góða skemmtun :)

Jarðaberjasokkar

2010-06-28T10:23:00.000Z

Ég fann íslenska uppskrift af þessum ÆÐISLEGU jarðaberja sokkum. Það er bara verst að það er engin lítil dama í kring um mig sem ég gæti prjónað þá fyrir !!!

Ég set uppskriftina hér til hliðar undir "prjónauppskriftir"

Ungbarna peysa

2010-06-28T10:04:00.000Z

Ég var að finna uppskrift af svo sætri ungbarnapeysu. Hún heitir Baby Boy 5-Hour Sweater. Ég ákvað að skella uppskriftinni hingað inn. Hún er eins og allar hiar fríu uppskriftirnar undir "prjónauppskriftir"

Góða skemmtun og gangi ykkur vel :)

Prjónuð póstkort :)

2010-06-18T10:15:00.000Z

Ég datt niður á þessa sniðugu hugmynd á netinu. Mér fannst þetta ferlega töff. Sniðugt að nota tímann ef veðrið er leiðinlegt í fríinu ;)

Ég setti inn ókeypis uppskrift sem ég fann líka á netinu. Hún er hér til hægri, undir "prjónauppskriftir"

Góða skemmtun !!!!!

Bylgjuteppi

2010-06-14T14:44:00.001Z

Ég var að muna eftir uppskrift sem ég fann á netinu síðasta vetur af svona ungbarna-bylgjuteppi. Ég ákvað að setja uppskriftina hingað inn. Hún er hér til hliðar undir "uppskriftir"

Svo var ein á barnalandi sem íslenskaði hana fyrir mig, íslenska þýðingin er svona :

Byrjar á að fitja upp 110 lykkjur mjög laust.
Prjónar 4 umferðir slétt (2 garðar)
Byrjar munstrið:

Umferð 1: Prjóna 2 saman, prjóna 2 saman, slá bandinu upp á prjóninn, prjóna eina, slá bandinu upp á prjóninn, prjóna eina, slá bandinu upp á prjóninn, prjóna eina, slá bandinu upp á prjóninn, prjóna 2 saman, prjóna 2 saman. Endurtekið út umferðina.

Umferðir 2-4: Prjóna slétt.

Endurtekur umferðir 1-4 þangað til þér finnst teppið orðið nógu langt.
Endar á 4 umferðum slétt (2 görðum) og fellir mjög laust af.

Gangi ykkur vel :)

3 mánuðir.......

2010-06-10T23:02:00.000Z

Eftir 2 daga eru liðnir 3 mánuðir síðan ég stofnaði þessa bloggsíðu. Mér datt í hug að hún gæti kannski verið einhverjum til gagns og gamans. Ég vona að hún hafi verið það. En mig langar til að þakka ykkur sem hafið verið að kíkja hingað inn fyrir innlitið og einnig fyrir kommentin :) Það er svooooo gaman að sjá þegar þið eruð að skoða síðuna mína og skiljið eftir smá komment eða kveðju hérna :)

En svona til gamans, þá langar mig til að segja ykkur það að á þessum 3 mánuðum er ég búin að fá hvorki meira né minna en 3600 heimsóknir á síðuna !!! Það er meira en 1000 heimsóknir á mánuði !!!

Takk, Takk fyrir þið sem kíkið á mig. É gætla að reyna að halda áfram að vera dugleg að uppfæra hérna. Setja inn fríar uppskriftir sem ég finn, myndir af því sem ég er að prjóna, sniðuga linka og kennsluvideo.

ef það er eitthvað sem þið sjáið að hægt er að bæta inn á síðuna mína, endilega látið mig vita :) Það er alltaf gaman að fá hugmyndir :)

Prjónakveðjur, Fríða prjónakella

Regnbogavettlingar - heimalitaði garn :)

2010-06-04T20:06:00.001Z

Jæja, nú er ég búin að prjona vettlingana sem eldri sonur minn pantaði úr garninu sem ég litaði :)

Hálfnað verk þá hafið er ;) Þarna var ég hálfnuð með annan vettlinginn, en búin með hinn, en átti eftir að gera þumalinn :)

Nærmynd :)

Tilbúnir :)
Sonurinn er hæstánægður og kallar þá regnbogavettlingana sína :) Ég var bara nokkuð sátt við útkomuna :) Svo á ég enn eftir garn, bæði þennan lit og græna litinn, ég er að spá í að prjóna kannski vettlinga á litlakút :)

Skrímslabuxur Nr 2 tilbúnar :)

2010-06-01T11:27:00.000Z

Jæja, þá er ég búin með skrímslabuxurnar fyrir yngri soninn :) Hann var sko heldur betur ánægður með buxurnar, það er sko EKKERT skemmtilegra en að eiga eins buxur og stori bróðir ;)

Skelli inn nokkrum myndum af honum í buxunum :) Uppskriftin er svo hérna til hægri, undir "uppskriftir" Ég reyndar breytti þeim aðeins en ég var búin að skrifa hérna inn hvernig ég breytti þeim, en það er aðeins neðar, þar sem ég setti inn myndir af skrímslabuxunum fyrir frumburðinn :)

Hérna eru báðar buxurnar :) Bláu eru á eldri strákinn og brúnu á þann yngri :)

Hann þurfti að sjálfsögðu að sýna mér "skrímsla-rassinn" :)

Þær passa mjög vel á hann, þó svo að hann sé enn með bleyju og ég sleppti útaukningunni á rassinum :)

Litli kall var svoooo ánægður neð nýju buxurnar sínar :)

Heimalitað garn

2010-05-26T15:04:00.000Z

Ég var að dunda mér við að lita garn heima og fékk þessa líku flottu liti :) Eldri sonurinn er búinn að velja sér hnykil sem hann vill að ég prjóni vettlinga á hann úr !!!

En þetta er mjög einfalt. Ég setti vatn og edik í pott. C.a. einn dl af ediki á móti 2 af vatni, lét suðuna koma upp. Setti þá garnið út í vatnið og létt bulla nokkrum sinnum, eða þar til garnið var orðið blautt í gegn. Svo var ég búin að blanda Wilton matarlitum í vatn og hellti yfir garnið. Einn lit á sitthvorn endann á dokkunni og einn lit í miðjuna. Svo tók ég garnið upp úr áður en litirnir blönduðust saman. (Þá hefði garnið bara orðið brúnt) Lét garnið svo þorna og skolaði það upp úr köldu vatni. Lét það svo þorna aftur og þvoði það svo upp úr sápu.

Einfalt og skemmtilegt :) Ég hlakka svo til að byrja á vettlingunum. (Þarf bara að klára einar skrímslabuxur fyrst)

Ungbarna-inniskór

2010-05-19T11:50:00.001Z

Ég var að finna uppskrift á netinu af þessum æðislega sætu ungbarna-inniskóm. Uppskriftina set ég hér til hliðar undir "prjónauppskriftir" en hún er í stærð 0-3 mánaða. En það er mjög einfalt að stækka hana með því að prjóna fleiri umferðir á sólanum og taka upp fleiri lykkjur við endann af sólunum.

Góða skemmtun að prjóna :)

Hálskragi

2010-05-12T10:23:00.000Z

Var að setja inn uppskrift af svona hálskraga. Hún er hér til hægri, undir "prjónauppskriftir"

Ungbarnaskór

2010-05-03T12:24:00.001Z

Ég var að klára að prjóna þessa sætu ungbarnaskó. Þeir eru mjög auðveldir að gera og ég var ekki nema c.a 2 tíma með hvort parið og svo kannski 1 tíma að ganga frá.

Sætir brúnir og hvítir með tré tölum.

og svo bláir og hvítir með bláum tölum :)

Uppskriftin er hér til hægri undir "prjónauppskriftir"

Skrímsla-rass

2010-04-26T12:59:00.000Z

Ég var að enda við að klára að prjóna þessar sætu skrímsla-rass buxur á eldri strákinn minn sem er tæplega 4 ára.

Ég setti link á uppskriftina hérna til hliðar undir "prjónauppskriftir"

Ég breytti reyndar uppskriftinni aðeins. En ég prónaði 10 umferðir í stroff (2 sléttar og 2 brugðnar) svo gerði ég eina gata umferð og svo aftur 10 umferðir í stroff. Svo sleppti ég útaukningunni í rassinn ( því að ég hef heyrt að buxurnar poki á rassinum ef barnið sem á að nota buxurnar er hætt með bleyju) Semsagt prjónaði bara slétt þar til stykkið mældist c.a. 15 cm með stroffi. (Ágætt að mæla það samt við barnið sem á að fá buxurnar). Svo setti ég bara rauðann lit þar sem ég vildi hafa munninn. Og þá bætti ég inn lykkjum fyrir skrefbót. Svo mældi ég bara hvað ég þurfti að hafa skálmarnar langar.

Strákurinn var sko heldur betur ánægður með skrímsla-buxurnar sínar. En hann var búinn að segja við mig að hann vildi hafa tungu á þeim og tennur :)

Ný uppskrift

2010-04-26T12:56:00.001Z

Var að setja inn uppskrift af ferlega sætum ungbarnahosum.
Uppskriftin er á dönsku, en hún er líka mjög einföld. Uppskriftin er hér til hliðar undir "prjónauppskriftir"

Góða skemmtun :)

Barnahúfa

2010-03-25T11:25:00.000Z

Ég prjónaði þessa sætu húfu um daginn. Húfuna er auðvelt að prjóna og sniðið á henni er alveg frábært og húfan liggur vel að andliti barnsins en fer samt ekki ofan í augu.

Uppskriftina fékk ég í bókinni Prjónaperlur. Eins og komið hefur fram hér a síðunni, þá er ég nýbúin að taka upp prjónana aftur eftir að hafa varla snert prjóna síðan í grunnskóla. En í þessari frábæru bók eru margar flottar og auðveldar uppskriftir, bæði fyrir byrjendur og lengra komna. Ég mæli því eindregið með bókinni fyrir alla prjónara :)

Hér er svo yngri sonur minn með húfuna :)

Ný prjónauppskrift komin inn !!!

2010-03-25T11:10:00.000Z

Var að setja inn prjónauppskrift af þessum æðislegu ungbarnaskóm. Uppskriftin er hér til hægri undir "prjónauppskriftir".

Vonandi getur einhver nýtt sér þessa uppskrift :)

Prjónauppskrift af te-hettu

2010-03-17T20:32:00.001Z

Ég var að setja inn uppskrift af þessari sætu te-hettu, en hún er tekin af síðunni www.knitty.com. Uppskriftin er hér til hliðar undir "prjónauppskriftir".

Það er mjög sniðugt að nota garn-afganga í te-hettuna. Hún er nefnilega mjög flott í mörgum litum :)

Nokkrir linkar....

2010-03-16T13:26:00.000Z

Jæja, ég er að vinna í að setja inn linka á hinar ýmsu prjónasíður. Ef þið vitið um einhverjar sniðugar síður, þá megið þið endilega láta mig vita :)

Nýtt prjónablogg !!!

2010-03-12T11:32:00.000Z

Inn á þessa bloggsíðu ætla ég að setja inn allt sem viðkemur prjónaskap. T.d. allskonar prjónakennslu, linka á prjóna-uppskriftir, myndir af hinum ýmsu prjónaverkum og margt margt fleira. Endilega látið mig vita ef þið rekist á eitthvað sem ykkur finnst að eigi að vera á þessari síðu.

Ég vona að þið eigið eftir að hafa bæði gagn og gaman af að lesa síðuna mína :)